/ جنون العصر /
ما عاد فيه اليوم يبدا من الصفر
بخصر الشقى مربوط جنزير العمر
واقف ع ضفة نهر طايف بالبكي
من وين بدّو يمر مكسور الجسر
عا كوع حزنو ونام عا تخت الصبر
يا هالدني على مين لازم يشتكي
عليكي بقى ولّا على جنون العصر
عم تخلص الأحلام شو باقي لكي
حتى الوفا بيموت عا إيدك نحر
وعم تندعس قدّام عينك ليلكي
وعم ينتحر كل يوم ع جبالك نسر
مازال صار الحق كذبة محنّكي
ورجعت شريعة الغاب تغتال الفكر
وصار الوجع يرسم خريطة مشربكي
وكاس العشق ملهوف عا شفة خمر
حتى الصمت مسكين نسّاه الحكي
وصار القلم مشتاق عا ريحة حبر
وناطر على مرصاد شباك الفرج
ملهوف حتى يفوت مملكة الشعر .
د. عيسى فضة
ليست هناك تعليقات:
إرسال تعليق