المجلة الإلكترونية لنشر الأعمال الأدبية والفنية للأديب والشاعر والملحن ..*صالح البعيني*..: / معذور بدي قول / بقلم الشاعر الكبير الدكتور [ عيسى فضة ]

عيسى فضة

/  معذور بدي قول   /
مفقود مفتاح الفرج يا هالزمن  
وباب الصبر مقفول
بعدو الجرح مفتوح بالوجع انسكن 
وما في دوا مقبول
عم تكبر الأورام وتزيد المحن
وصار الدرب مجهول
صوت العشق مبحوح من كتر الشجن 
معذور بدي قول 
خم الحكي بالصمت في ريحة عفن 
وصرنا بوقت مخجول
هالفاعل اللي كان فعلو مؤتمن 
عم ياكل المفعول
كتروا المآسي فيك يا أغلى وطن
وهالحال مش مقبول
يا هالوطن شوف الشعب كيف التعن 
شبعنا حكي معسول
المسؤول همّو بس أسعار الدولار 
والشعب برغيف الخبز مشغول.  د. عيسى فضة