المجلة الإلكترونية لنشر الأعمال الأدبية والفنية للأديب والشاعر والملحن ..*صالح البعيني*..: / عيدك فرح شامي / بقلم الشاعر المقدر الدكتور [ عيسى فضة ]

عيسى فضة

مشرف

/  عيدك فرح شامي  /
يا شام  مدّي  شرشف  الغفران 
               وغطي  الوطن  وتزنّري  بفرسان
برمضان  عيدك  فرح  شامي 
               حنّي  الأيادي  وتكحّلي  بنيسان
حملنا  الصليب  بنور  إسلامي 
                 وصار  الصليب  يعانق  القرآن
ونصلّي  لألله  بعيد  القيامي 
               يقوم الوطن  من فرشة الأحزان 
وتخلص  بقى  يا شام  آلامي 
                وإنتي معي رح  غافل النسيان 
بعيد  المسيح  وزور  أحلامي 
                 انشالله  بعد  ما تغيّر  العنوان 
حملت  الأماني  وجيت لا تنامي 
                تا عايدك  يوم  المنى  وفزعان 
يمرق  عتم   مجنون  قدامي
             وإتفركش  بدمعة  طفل  جوعان
وموعود  رح  يولد وطن سامي 
              من جديد أحلى كتير  مما  كان 
عيد الفصح عيد الفطر ينعاد 
              ويرجع  وطنّا  للسلام  وللأمان  .
                                       د. عيسى فضة