/ الصبر و الإنتظار /
ماعاد مقبول العذر والإعتذار
صار العمر ماشي متل ختيار
صوب السعاده صعب إنو نروح
حتى الطقس متل الحريقه صار
والجو نارو بتشبه الأسعار
قالت حبيبي وين بدنا نروح
وبعدو الوطن تحت الحصار
باب الفرج مقفول مش مفتوح
وآخر وقت ناح الحمام وطار
شوف الورد تحت الدعس مشلوح
ولا الجار باقي يا وطن للجار
صوت الحقيقه من الكذب مبحوح
وصار العشق يبكي على عشتار
ما ضل فيها غير نزف جروح
وبعض البقايا من حلم منهار
ولسّا بعد بتقول يا حلوي اصبري
متل الوقف صرنا ع باب الإنتظار .
د. عيسى فضة
ليست هناك تعليقات:
إرسال تعليق