/ بحبك يا واحة /
بحبك يا واحه النايمه بتخت القمر
وعا عرش مملكة الحلى بتتربّعي
بحبك أميره ولابسه تياب السهر
نجوم الفكر فوق النجوم بترفعي
وقلب الوطن مجروح عم تتوجعي
بيضل إسمك سيف يتحدّى القدر
عا مرفعك مرفوع مرفع مرفعي
وبقيان صوتك للمدى غناني المطر
وصالح معك عنوان قاموس الوعي
حروفو مع الإبداع مرصد للنظر
ومن منهلو بيضل طالع منبعي
كلما ع بالي وجهك الأبيض خطر
بغسل بريحة ياسمينك مدمعي
ومع كل أول ضو ببعتلك خبر
بجعبة قصيده مدوزنه تا تسمعي
إني إلك مشتاق والشوق اختمر
إسكر معك بالروح وخيالك معي
ولو هالوقت بيصير قلبو من حجر
فيكي أنا بطلع على برج السلام
وإنتي معي عا برج قلبي بتطلعي .
د. عيسى فضة
ليست هناك تعليقات:
إرسال تعليق