المجلة الإلكترونية لنشر الأعمال الأدبية والفنية للأديب والشاعر والملحن ..*صالح البعيني*..: / العام الجديد مفتاح الأمل / بقلم الشاعر المقدر الدكتور [ عيسى فضة ]

عيسى فضة

مشرف

/   العام الجديد مفتاح الأمل  /
العام اهترى وبعدو الحلم موجوع
                محزون فل وحامل غراضو معو 
مبحوح  صوتو  ما بقي  مسموع
                 بواب  الأماني  تكسرو  وتخلّعو 
خلّا الوقت مصلوب فوق الجوع
             تارك وطن مجروح جرحو بيوجعو  
وحبل  الأمل  متل الدوا مقطوع 
                   لا كهربا  والمي  ناشف  منبعو  
من البوع طايف هالحزن للكوع 
                  تياب  المآسي  ما بقى  يترقّعو   
وبيلملم  تيابو  متل  مصروع 
                     دقّات  قلبو  توقّفو  وتشمّعو 
كسرنا وراه جرار ملياني دموع
                 لمّا  على الأطلال  رحنا  نودّّعو
تيروح ما يبقى إلو تاني رجوع            
                ويفوت عام جديد مفتاحو معو 
يفتح طريق النور ويضوّي الشموع  
              ويكون  فاعل  خير  رافع  مرفعو
ويبقى المرور اليوم  مش  ممنوع
              بلكي الفرج بيفوت بالعام الجديد
     وأفراحنا  بأغلى وطن  رح برجعو .
                                         د. عيسى فضة