حوار زجلي بين ( الشاعرة المقدرة زهرة عوض والشاعر الفنان المقدر مدين رحال )

 

مدين رحال

مساهم بارز

 

 · ٥٧ د

 

 · 

(زهرة عوض &&&&&&&& و مدين رحال)

حوار زجلي تم بالمصادفة ليلة أمس بتاريخ 2024/5/26 بيني وبين الشاعرة السورية القديرة الأستاذة زهرة عوض ضمن التعليقات في منشور على صفحتها

-----------------------------------------

الموصوع : الحزن أضراره وفوائده

&&&&&&&&&&&

البداية : مدين رحال

فيي الحزن ياناس عزز موقعو

استوطن بروحي وكيف بدي طَلّعو

ال عندو دوا ضد القهر والإكتئاب

يْشَرّف لعندي وجايب الوصفة معو

----------------------------

زهرة عوض

شو الحزن ؟ إلا باب قلبك شرعو

ليوسوس الشيطان خبثو ويزرعو

سكر عليه ، بحسن ظنك بالإله

وشوك الحزن والهم من شلشو قْلعو

-----------------------------

مدين

لما الحزن يِطْبق على القلب الرقيق

بيجرح الروح بيكسر الجنح الطليق

حتى العقل بيصير في حالة ضياع

نايم ب جمجمة القهر مش رح يفيق

-------------------------

زهرة

ضيفك معلم شاطر وعابر طريق

جايه يدلك عالعدو وعالصديق

ينظف بقايا جروح فيك معلمة

أو يصفعك حتى من جْنونك تفيق

-------------------------

مدين

الضيف اللطيف بقلب عيني بوضعو

بس ن اجا ينزع حياتي بْقَلعو

جايي العَدوّ ولابس تياب الصديق

من جنون عاطفتي انا ضايع معو

---------------------------

زهرة

بعين البصيرة تأمل وشوف الغيوم

بتمرق ل حتى تغسل غبار الهموم

معقول في فلاح بيحب الضرر

لما الشجر بيعالجو برش السموم

------------------------

مدين

بتستشهدي بالأدوية وسْمومْها

وغيمة ب تروي أرضنا وكرومها

ياما المطر من قوتو هَدّم بيوت

وسم النفس ورثة انظلم محرومها

------------------------

زهرة

حتى العواصف بالرسالة مْكلفة

تجرف زبد بسيولها. تاتكتفي

وع كِل جبل صامد بإيمانو ثبت

بتوزع نْياشين باللطف الخفي

،-----------------------------

مدين

ب فكرة جديدة بروح عاتاني طريق

بْضَمّد جروح العاشقين من الحريق

شو قولك ب عشقان كسرِت خاطرو

محبوبتو وْصَفّى بأحزانو غَريق

---------------------------------

زهرة

مغموس قلبك بالعتم وسط الضلال

ارجع ل الله وتوب ياابن الحلال

بيستخرج الرحمن مكنون الدعا

بالعجز ،، حتى يطهرك متل الزلال

-------------------------------

مدين

أيّا شريعة بتمنع القلب الحنون

ال حَب بطهارة وماسلك درب المجون

ولوما الغرام يحللو رب السما

كنا انقرضنا وصارت الدنيا سكون

-------------------------------؛

زهرة

ختيار حظك بالعشق راح انعطب

مش زابطة يقولوا عشق بنت وخطب

الحب الحقيقي بيلزقك كالمغناطيس

وصفيان انت بهالدني كومة حطب

----------------------------

مدين

عمري يَ زهرة ماحسبتو بالسنين

فيي الوقار مكلل ورافع جبين

لم بِفْرِق الغِرّة بْشَعري عاليمين

بشوف الصبايا حول مني مجمعين

مِني ابن عشرين طق بغيرتو

وخايف ع حالي من عيون الحاسدين

--------------------------------------------

شكرا لكل من تابعنا

عرض الرؤى

عرض الرؤى

معدل وصول المنشور: ١٤

كل التفاعلات:

٣

أنت، وعيسى فضة وياسر حامد